യുദ്ധം അനിവാര്യമോ? ട്രംപിന്റെ മൗനവും ഇസ്രായേലിന്റെ യുദ്ധപ്പുറപ്പാടും

ദർവേശ്.

മിഡിൽ ഈസ്റ്റ് വീണ്ടുമൊരു വൻ യുദ്ധത്തിന്റെ നിഴലിലാണോ? ഇസ്രായേൽ മാധ്യമമായ ‘Haaretz’ പുറത്തുവിട്ട ഏറ്റവും പുതിയ റിപ്പോർട്ടുകൾ വിരൽ ചൂണ്ടുന്നത് ഈയൊരു ആശങ്കയിലേക്കാണ്.

ഒരു വശത്ത് അമേരിക്കൻ പ്രസിഡന്റ് ഡൊണാൾഡ് ട്രംപ് ഇറാൻ വിഷയത്തിൽ കൃത്യമായ നിലപാടില്ലാതെ മടിച്ചുനിൽക്കുമ്പോൾ, മറുവശത്ത് ഇസ്രായേൽ ഇറാനെതിരെയുള്ള അടുത്ത ഘട്ട സൈനിക നീക്കങ്ങൾക്ക് പൂർണ്ണ സജ്ജമാകുന്ന കാഴ്ചയാണ് കാണുന്നത്. കഴിഞ്ഞ വർഷത്തെ യുദ്ധങ്ങൾക്കൊന്നും ഇറാന്റെ ആണവ-മിസൈൽ ശേഷിയെ തളർത്താൻ കഴിഞ്ഞിട്ടില്ലെന്ന മുൻ ഇന്റലിജൻസ് മേധാവിയുടെ വെളിപ്പെടുത്തൽ മേഖലയിലെ രാഷ്ട്രീയ സമവാക്യങ്ങളെ പാടെ മാറ്റിമറിക്കുകയാണ്.

മിഡിൽ ഈസ്റ്റ് വീണ്ടുമൊരു വൻ യുദ്ധത്തിന്റെ നിഴലിലാണോ? ഇസ്രായേൽ മാധ്യമമായ ‘Haaretz’ പുറത്തുവിട്ട ഏറ്റവും പുതിയ റിപ്പോർട്ടുകൾ വിരൽ ചൂണ്ടുന്നത് ഈയൊരു ആശങ്കയിലേക്കാണ്. ഒരു വശത്ത് അമേരിക്കൻ പ്രസിഡന്റ് ഡൊണാൾഡ് ട്രംപ് ഇറാൻ വിഷയത്തിൽ കൃത്യമായ നിലപാടില്ലാതെ മടിച്ചുനിൽക്കുമ്പോൾ, മറുവശത്ത് ഇസ്രായേൽ ഇറാനെതിരെയുള്ള അടുത്ത ഘട്ട സൈനിക നീക്കങ്ങൾക്ക് പൂർണ്ണ സജ്ജമാകുന്ന കാഴ്ചയാണ് കാണുന്നത്. കഴിഞ്ഞ വർഷത്തെ യുദ്ധങ്ങൾക്കൊന്നും ഇറാന്റെ ആണവ-മിസൈൽ ശേഷിയെ തളർത്താൻ കഴിഞ്ഞിട്ടില്ലെന്ന മുൻ ഇന്റലിജൻസ് മേധാവിയുടെ വെളിപ്പെടുത്തൽ മേഖലയിലെ രാഷ്ട്രീയ സമവാക്യങ്ങളെ പാടെ മാറ്റിമറിക്കുകയാണ്.

ഇറാന്റെ ‘അജയ്യമായ’ ഭൂഗർഭ ആണവ സാമ്രാജ്യം

ഇസ്രായേലിന്റെ ഇൻസ്റ്റിറ്റ്യൂട്ട് ഫോർ നാഷണൽ സെക്യൂരിറ്റി സ്റ്റഡീസ് (INSS) എക്സിക്യൂട്ടീവ് ഡയറക്ടറും മുൻ മിലിട്ടറി ഇന്റലിജൻസ് ഉദ്യോഗസ്ഥനുമായ മേജർ ജനറൽ തമീർ ഹെയ്മാന്റെ നിരീക്ഷണങ്ങൾ ഇസ്രായേലിനെ സംബന്ധിച്ച് ഞെട്ടിക്കുന്നതാണ്. കഴിഞ്ഞ വർഷത്തെ ‘ഓപ്പറേഷൻ റോറിംഗ് ലയൺ’ ഉൾപ്പെടെയുള്ള സൈനിക നീക്കങ്ങൾ ഇറാന്റെ കമാൻഡ് ഘടനയെ താൽക്കാലികമായെങ്കിലും ഉലച്ചെങ്കിലും, അവരുടെ പ്രധാന ലക്ഷ്യങ്ങളായ ഭരണമാറ്റവും ആണവ പദ്ധതി തകർക്കലും പരാജയപ്പെട്ടു.

ഹെയ്മാന്റെ കണ്ടെത്തലുകളെ ഇങ്ങനെ സം​ഗ്രഹിക്കാം:
പിക്ആക്സ് മൗണ്ടൻ (Pickaxe Mountain): വ്യോമാക്രമണങ്ങളെപ്പോലും പ്രതിരോധിക്കാൻ ശേഷിയുള്ള, നതാൻസ് ആണവനിലയത്തിന് സമീപമുള്ള അതിശക്തമായ ഭൂഗർഭ കേന്ദ്രത്തിന്റെ നിർമ്മാണം ഇറാൻ വേഗത്തിലാക്കി.
മിസൈൽ ഉൽപ്പാദനം: യുദ്ധത്തിനിടയിലും പ്രതിമാസം 125 ബാലസ്റ്റിക് മിസൈലുകൾ എന്ന തോതിലേക്ക് ഇറാന്റെ ഉൽപ്പാദന ശേഷി ഉയർന്നു.
ഹിസ്ബുള്ളയുടെ തിരിച്ചുവരവ്: സിറിയയിലെ അസദ് ഭരണകൂടം തകർന്നിട്ടും, ലബനനിലെ ഹിസ്ബുള്ളയുടെ ബജറ്റ് ഇരട്ടിയാക്കാനും അവർക്ക് പുതിയ ആയുധ വിതരണ ശൃംഖല ഉറപ്പാക്കാനും ഇറാനായി.
ഈ വസ്തുതകളിൽ നിന്നെല്ലാം ഹെയ്മാൻ എത്തുന്ന നി​ഗമനം ഇപ്രകാരമാണ്:
“ഒരു വർഷത്തിനിടയിൽ രണ്ട് വലിയ യുദ്ധങ്ങൾ നേരിട്ട ഇറാൻ ഇപ്പോൾ ചിന്തിക്കുന്നത്, അമേരിക്കയിൽ നിന്നും ഇസ്രായേലിൽ നിന്നുമുള്ള ഭാവി ആക്രമണങ്ങളെ തടയാൻ തങ്ങൾക്ക് ‘ആണവ പ്രതിരോധം’ (Nuclear Deterrence) മാത്രം പോരാ, സ്വന്തമായി ആണവായുധം തന്നെ വേണമെന്നാണ്.”
വാസ്തവത്തിൽ ഇറാനെ ആക്രമിക്കുന്നതിനും തകർക്കുന്നതിനുമുള്ള നീതികരണമായി ചമക്കപ്പെടുന്നതാണ് ഇത്തരം ആശങ്കകളും ഊഹങ്ങളുമെന്ന് നിരീക്ഷിക്കുന്നവരുമുണ്ട്.

ട്രംപിന്റെ നയതന്ത്ര പരാജയവും അമേരിക്കൻ മൗനവും

ഇറാനെതിരെ ശക്തമായ ഉപരോധങ്ങളും സൈനിക ഭീഷണികളും ഉയർത്തുമെന്ന് പ്രതീക്ഷിച്ച ഡൊണാൾഡ് ട്രംപ് ഇപ്പോൾ അത്ര സജീവമല്ല. ചൈനീസ് പ്രസിഡന്റ് ഷി ജിൻപിംഗുമായി ബെയ്ജിംഗിൽ ട്രംപ് നടത്തിയ ചർച്ചകൾ പരാജയപ്പെട്ടതായാണ് റിപ്പോർട്ടുകൾ. തായ്‌വാൻ വിഷയത്തിൽ ചൈനയ്ക്ക് ഇളവുകൾ നൽകി പകരം പേർഷ്യൻ ഗൾഫ് പ്രതിസന്ധിയിൽ ചൈനയുടെ സഹായം ഉറപ്പാക്കാനുള്ള ട്രംപിന്റെ നയതന്ത്ര നീക്കം പാളിപ്പോയി എന്നാണ് പ്രവണതകൾ വ്യക്തമാക്കുന്നതെന്ന് ഹാരെറ്റ്സ് നിരീക്ഷിക്കുന്നു.
ലബനനിലെ വെടിനിർത്തൽ നീട്ടിയെന്ന അമേരിക്കയുടെ പ്രഖ്യാപനം വെറും ‘വ്യാജ പ്രസ്താവന’ മാത്രമാണെന്നും അവർ ചൂണ്ടിക്കാട്ടൂന്നു. ബെയ്റൂട്ടിലെ ആക്രമണങ്ങൾക്ക് ട്രംപ് നിയന്ത്രണം ഏർപ്പെടുത്തിയിട്ടുണ്ടെങ്കിലും, ലിതാനി നദിക്ക് തെക്ക് ഇസ്രായേലും ഹിസ്ബുള്ളയും തമ്മിലുള്ള കടുത്ത പോരാട്ടം ഇപ്പോഴും തുടരുകയാണ്.

ഇസ്രായേലിന്റെ ആഭ്യന്തര പ്രതിസന്ധികളും ‘ഗൗരവമില്ലായ്മയും’

ഈ വലിയ അന്താരാഷ്ട്ര പ്രതിസന്ധികൾക്കിടയിലും ഇസ്രായേൽ സർക്കാർ കാണിക്കുന്ന രാഷ്ട്രീയ ഗൗരവമില്ലായ്മ രാജ്യത്തിനുള്ളിൽ തന്നെ വലിയ വിമർശനങ്ങൾക്ക് വഴിവെക്കുന്നുണ്ട്. വടക്കൻ അതിർത്തികളിൽ ഡ്രോൺ ആക്രമണങ്ങളിൽ ഇസ്രായേലി സൈനികരും സാധാരണക്കാരും കൊല്ലപ്പെടുമ്പോൾ, ബെഞ്ചമിൻ നെതന്യാഹുവിന്റെ സർക്കാർ നാശനഷ്ടങ്ങൾ കുറച്ചുകാണിക്കാനാണ് ശ്രമിക്കുന്നത്.
പ്രതിരോധ മന്ത്രി ഇസ്രായേൽ കാറ്റ്സ് അന്താരാഷ്ട്ര വിഷയങ്ങളിലും ആഭ്യന്തര തർക്കങ്ങളിലും (ഉദാഹരണത്തിന് സ്പെയിൻ പ്രധാനമന്ത്രിയുമായുള്ള തർക്കം) ശ്രദ്ധ കേന്ദ്രീകരിക്കുമ്പോൾ, സൈന്യം നേരിടുന്ന ഏറ്റവും വലിയ പ്രതിസന്ധി ‘മനുഷ്യശേഷി’യുടെ കുറവാണ്.
വനിതാ സൈനികരുടെ എണ്ണം മൂന്നിരട്ടിയാക്കിയിട്ടും റിസർവ് സൈനികരെ തിരിച്ചുവിളിച്ചിട്ടും ഐ.ഡി.എഫിന് (IDF) നിലവിൽ 12,000 സൈനികരുടെ കുറവുണ്ട്, അതിൽ പകുതിയും കോംബാറ്റ് യൂണിറ്റുകളിലാണ്.
എന്നാൽ ഇതിന് പരിഹാരമായി അൾട്രാ ഓർത്തഡോക്സ് (ഹരേദി) ജൂതന്മാരെ നിർബന്ധിത സൈനിക സേവനത്തിൽ ഉൾപ്പെടുത്തുന്ന ബിൽ പാസാക്കാൻ വോട്ട് ബാങ്ക് രാഷ്ട്രീയം ഭയന്ന് നെതന്യാഹു മടിക്കുന്നു.

മിഡിൽ ഈസ്റ്റ് എങ്ങോട്ട്?

Haaretz-ന്റെ വിശകലനം നൽകുന്ന സൂചന വ്യക്തമാണ്: ആകാശക്കണ്ണുകളുള്ള ആധുനിക വ്യോമശക്തിക്ക് പരിമിതികളുണ്ടെന്ന് ഇറാന്റെ ഭൂഗർഭ താവളങ്ങൾ തെളിയിച്ചു കഴിഞ്ഞു. അമേരിക്കൻ ഭരണകൂടം കൃത്യമായൊരു തീരുമാനമെടുക്കാൻ മടിച്ചുനിൽക്കുമ്പോൾ, ഇസ്രായേൽ തനിച്ചാണെങ്കിലും ഇറാനെതിരെ വലിയൊരു യുദ്ധത്തിന് കോപ്പുകൂട്ടുകയാണ്. ഇറാന്റെ പുതിയ പരമോന്നത നേതാവ് മൊജ്തബ ഖമേനി തന്റെ പിതാവിനേക്കാൾ കടുത്ത നിലപാടുകാരനാണെന്നത് വരും ദിവസങ്ങളിൽ മിഡിൽ ഈസ്റ്റിൽ ഒരു ‘ആണവ യുദ്ധ’ത്തിന്റെ സാധ്യത പോലും തള്ളിക്കളയാനാവില്ലെന്ന ഭീതിദമായ യാഥാർത്ഥ്യത്തിലേക്ക് വിരൽ ചൂണ്ടുന്നുവെന്നാണ് ഹെയ്മാന്റെ ആശങ്കകളെ മുൻനിറുത്തി Haaretz സം​ഗ്രഹിക്കുന്നത്. വാസ്തവത്തിൽ ഇറാനെതിരെ ആണവ ഭീഷണി ഉയർത്തുന്നവർ തന്നെയാണ് യഥാർത്ഥത്തിൽ മേഖലയിൽ ഒരു ‘ആണവ യുദ്ധ’ത്തിനുവേണ്ടി കോപ്പു കൂട്ടുന്നത് എന്നാണ് പ്രവണതകൾ വ്യക്തമാക്കുന്നത്. യാതൊരു യുദ്ധനിയമങ്ങളും പാലിക്കാത്ത ഇസ്രായേൽ ആണ് യഥാർത്ഥ ആണവ ഭീഷണി ഉയർത്തി ലോകസമാധാനത്തിന് തുരങ്കം വെക്കുന്നത്. അതുകൊണ്ട് തന്നെ ലോകം വളരെ ആശങ്കയോടെയാണ് മിഡിൽ ഈസ്റ്റിലെ സമകാലിക രാഷ്ട്രീയ പ്രവണതകളെ നോക്കി കാണുന്നത്.