മുഹമ്മദ് സുൽത്വാൻ ബാഖവി കായൽപട്ടണം
ഹാജി ഇംദാദുല്ലാഹ് മുഹാജിർ മക്കി(റ) യുടെ ഫൈസലയെ ഹഫ്ത് മസ്അല എന്ന ഗ്രന്ഥത്തിന്റെ മലയാള പരിഭാഷ ആരംഭിക്കുന്നു. ഉർദുവിൽ നിന്നുള്ള ഈ ഗ്രന്ഥം തമിഴിലേക്ക് വളരെ ഭംഗിയായ നിലയിൽ മൊഴിമാറ്റി പ്രസിദ്ധീകരിക്കപ്പെട്ടിട്ടുള്ളതിനാൽ തമിഴ് ഗ്രന്ഥമാണ് ഇവിടെ പരിഭാഷക്ക് അവലംബിക്കുന്നത്. ദക്ഷിണേന്ത്യയിലെ വിഖ്യാതനായ യുവപണ്ഡിതനും പ്രഭാഷകനുമായ കായൽപട്ടണം സ്വദേശി അൽ ഹാഫിള് മുഹമ്മദ് സുൽത്വാൻ ബാഖവിയാണ് ഇതിന്റെ തമിഴ് മൊഴിമാറ്റം നിർവ്വഹിച്ചിട്ടുള്ളത്. തമിഴ് പരിഭാഷയുടെ ആമുഖഭാഗത്തുള്ള പ്രസാധക കുറിപ്പാണ് ഇവിടെ പ്രസിദ്ധീകരിക്കുന്നത്. മുസ് ലിം സമൂഹത്തിൽ പരസ്പരം ശിർക്കും കുഫ്റും ബിദ്അത്തുമാരോപിച്ച് ഭിന്നതകളായി പടരുന്ന ആശയകാലുഷ്യങ്ങളെ സംബന്ധിച്ച് സച്ചരിതരായ പൂർവ്വീക പണ്ഡിതന്മാരുടെ സമീപനങ്ങളെന്തായിരുന്നുവെന്ന് നിർദ്ധാരണം ചെയ്യുന്ന വിഖ്യാതമായ ഗ്രന്ഥമാണിത്.
പ്രസാധക കുറിപ്പ്:
സ്തുതികളെല്ലാം അല്ലാഹുവിനു മാത്രമുള്ളതാണ്. സ്വലാത്തും സലാമും നമ്മുടെ ഇരുലോക നേതാവ് മുഹമ്മദ് മുസ്വത്വഫാ റസൂലുല്ലാഹി സ്വല്ലല്ലാഹു അലൈഹിവസല്ലം തങ്ങളുടെ മേലും, നബിമാരുടെ കുടുംബാംഗങ്ങൾ, സച്ചരിതരായ സ്വഹാബാക്കൾ എല്ലാവർക്കും ഉണ്ടാകട്ടെയെന്ന് പ്രാർത്ഥിക്കുന്നു!
നബി(സ്വ) തങ്ങളുടെ കാലത്ത് തന്നെ ഇന്ത്യയിൽ ഇസ്‌ലാം വ്യാപിക്കാൻ തുടങ്ങിയിരുന്നു. തെക്കേ ഇന്ത്യയിൽ സ്വഹാബാക്കൾ വഴി ഇസ്‌ലാം പരന്നതിനുള്ള നിരവധി ചരിത്രപരമായ തെളിവുകളുണ്ട്. സ്വഹാബാക്കൾ, താബിഈങ്ങൾ, തബഉത്താബിഈങ്ങൾ എന്നിങ്ങനെ തലമുറതലമുറയായി തുടർന്നുവരുന്ന പാരമ്പര്യത്തോടുകൂടി നമ്മുടെ സമൂഹത്തിൽ നിരവധി നല്ല മനുഷ്യർ ജീവിച്ചിട്ടുണ്ട്. ആ ഉന്നത വ്യക്തികളുടെ വിശുദ്ധ ജീവിതരീതി കണ്ടാണ് പലരും ഇസ്‌ലാം സ്വീകരിച്ചിട്ടുള്ളത്. ഭൂരിഭാഗം പേരും അങ്ങനെയാണ് മുസ്ലീങ്ങളായത്. എന്നാൽ, നമ്മുടെ പാരമ്പര്യത്തെയും സംസ്കാരത്തെയും നിന്ദിച്ചും, പരിഹസിച്ചും കളിയാക്കുന്നത് മാത്രം പതിവായിക്കൊണ്ടിരിക്കുന്ന ഒരു ചെറിയ സമൂഹം നമ്മുടെയിടയിൽ രൂപപ്പെട്ടിരിക്കുന്നു. യാതൊരു മടിയും കൂടാതെ തങ്ങളുടെ മുൻഗാമികളെ വഴിപിഴച്ചവരായി ചിത്രീകരിക്കുന്ന ഈ അപമാനകരമായ അവസ്ഥ കാണുമ്പോൾ ഏത് സത്യസന്ധനായ വ്യക്തിക്കും ആവലാതിയാണ് വർദ്ധിക്കുക. വിവേകശൂന്യരായ ഈ ആധുനിക വിഭാഗക്കാരാണ് നമ്മുടെ സമൂഹത്തെ പലതായി ഭിന്നിപ്പിച്ച് കഷ്ണങ്ങളാക്കിയത്.
ഈ രോഗം മൂർച്ഛിച്ച് പടർന്നപ്പോൾ, നല്ല മനുഷ്യരായ മുൻഗാമികളെയും (സലഫു സ്വാലിഹീങ്ങളെയും) ഇമാമുകളെയും അംഗീകരിക്കണമെന്ന് വാദിക്കുന്ന ചിലരിലേക്കും ഇത് പടർന്നുപിടിച്ചു. ഇപ്പോൾ അവരും ദീൻ തടയാത്ത കാര്യങ്ങളെയെല്ലാം വലിയ പാപങ്ങളായി ചിത്രീകരിച്ച് അവയ്ക്ക് ശിർക്ക്, കുഫ്ർ, ബിദ്അത്ത് എന്ന് പേരിടുന്നു. ഇത് കാരണമാക്കി മുസ്ലീങ്ങളുടെ നിത്യജീവിതം അവർ കൂടുതൽ പ്രയാസകരമാക്കുന്നു. ഇസ്‌ലാം എന്ന ലളിതവും സൗമ്യവുമായ ജീവിതപാതയെ ‘വരണ്ടതും തടസ്സങ്ങൾ നിറഞ്ഞതുമായ’ ഒരു മാർഗ്ഗമായി അവർ പരിചയപ്പെടുത്തുന്നു.
പണ്ടുമുതലേ നിലനിന്നുപോരുന്ന അനുവദനീയമായ പല കാര്യങ്ങളെയും ശിർക്ക്, ബിദ്അത്ത് എന്ന് വിശേഷിപ്പിച്ചുകൊണ്ട്, അറിയാതെ തന്നെ മുൻകാല നല്ല മനുഷ്യരെ ബിദ്അത്തുകാരായും മുശ്‌രിക്കുകളായും ചിത്രീകരിക്കാൻ അവർ മുതിരുന്നു. അതേസമയം ദീനിന്റെ കടമകൾ പോലും കൃത്യമായി നിർവഹിക്കാതെ, ചില ചടങ്ങുകളും അനാചാരങ്ങളും മാത്രം അനുഷ്ഠിക്കുന്നതും, അവയെ ആരാധനാ കർമ്മങ്ങളായി ചിത്രീകരിക്കുന്നതും കർശനമായി തടയപ്പെടേണ്ടതാണ്.
വിവരസാങ്കേതികവിദ്യ വളർന്ന ഈ കാലഘട്ടത്തിൽ, ഇതുപോലുള്ള ആവശ്യമില്ലാത്ത തർക്കങ്ങൾ നിമിഷനേരം കൊണ്ട് ലോകമെമ്പാടും പ്രചരിക്കുന്നു; അല്ലെങ്കിൽ ബോധപൂർവ്വം പ്രചരിപ്പിക്കപ്പെടുന്നു. ഇതുമൂലം യഥാർത്ഥ ലക്ഷ്യത്തിൽ നിന്നും ശ്രദ്ധ തിരിക്കപ്പെടുകയും, വളരെ ചെറിയ നിസ്സാര കാര്യങ്ങൾ പോലും വലിയ തർക്ക വിഷയങ്ങളായി മാറ്റപ്പെടുകയും ചെയ്യുന്നു. ഇതിന്റെ ഫലമായി പരസ്പര വിരോധം, പക, സഹോദര മുസ്ലീങ്ങളെ അധിക്ഷേപിക്കുന്നത്, അവരുടെ പരാജയത്തിൽ സന്തോഷിക്കുന്നത് തുടങ്ങിയ രോഗങ്ങളിൽ അകപ്പെട്ട് ജീവിതകാലം പാഴാക്കപ്പെടുന്നു. ഓരോ വിഭാഗവും അവരവർക്ക് അനുകൂലമായ തെളിവുകൾ പറഞ്ഞിട്ടും വാദങ്ങൾ അവസാനിക്കുന്നില്ല. ദീനീ വിദ്യാഭ്യാസം കൃത്യമായി നേടാത്തതും, നല്ല മനുഷ്യരായ മുൻഗാമികളെ പിൻപറ്റാത്തതുമാണ് ഇതിന് പ്രധാന കാരണങ്ങൾ.
അതിനാൽ, ഓരോരുത്തരും അവരവരുടെ വാദങ്ങൾ വെച്ച് ഇതിൽ തർക്കിച്ചുകൊണ്ടിരിക്കുന്നതിന് പകരം, ആർക്കും തർക്കമില്ലാത്ത, എല്ലാവരും സ്വീകരിക്കാനും പിൻപറ്റാനും യോഗ്യരായ സർവ്വസ്വീകാര്യരായ പണ്ഡിതമഹത്തുക്കളിലൂടെ ഇതിന് പരിഹാരം കാണുന്നതാണ് ബുദ്ധിപൂർവ്വമായ നടപടി. ഇത്തരം യോഗ്യതയ്ക്ക് അർഹനായ മൂലഗ്രന്ഥത്തിന്റെ രഹസ്യങ്ങളുടെ അധിപനായ ബഹുമാന്യവ്യക്തിത്വം ഹാജി ഇംദാദുള്ളാഹ് മുഹാജിർ മക്കീ (റ) യെയാണ് നാം ഇവിടെ അവലംബമാക്കുന്നത്. കാരണം, മഹാനവർകൾ ഉന്നതമൂല്യങ്ങളുള്ള ഒരു മഹാമനുഷ്യനും ഒരു മഹാപണ്ഡിതനും ആണ് എന്നതോടൊപ്പം, മറ്റുള്ളവരെയും നല്ല മനുഷ്യരാക്കി മാറ്റാൻ പ്രാപ്തിയുള്ളവരുമാണ്. ആയിരക്കണക്കിന് ആളുകൾ മഹാനവർകളിലൂടെ നേർവഴി പ്രാപിച്ച് വലിയ വലിയ ഔലിയാക്കളായും ശൈഖുമാരായും പരിണമിച്ചിട്ടുണ്ട്.
കഴിഞ്ഞ നൂറ്റാണ്ടിന്റെ പരിഷ്കർത്താവായി അല്ലാഹു നിശ്ചയിച്ചവരാണ് ഹാജി ഇംദാദുല്ലാഹ് മുഹാജിർ മക്കി(റ) എന്ന് ആ ജീവിതം സാക്ഷ്യപ്പെടുത്തിയിട്ടുണ്ട്. നേർവഴി കാണിക്കുക, ജ്ഞാനം പകർന്നു നൽകാനുള്ള വിദ്യാഭ്യാസ സംവിധാനങ്ങൾ സ്ഥാപിക്കുക, മനസ്സിനെ സംസ്കരിക്കുക, മനുഷ്യമനസ്സുകളിൽ അല്ലാഹുവിനോടും റസൂൽ(സ്വ) തങ്ങളോടുമുള്ള യഥാർത്ഥ സ്നേഹം നിറയ്ക്കുക തുടങ്ങിയ സൽക്കർമ്മങ്ങളിൽ അവർ പ്രഗത്ഭരായിരുന്നു. അതിനാൽ മറ്റുള്ളവർക്ക് ചെയ്യാൻ കഴിയാത്ത വലിയ നേട്ടങ്ങൾ അല്ലാഹു അവർക്ക് എളുപ്പമാക്കി കൊടുത്തു. ഈ ഭാഗ്യം ലഭിച്ച ശൈഖ് അവർകൾ സ്വന്തം അനുഭവങ്ങളും ദീർഘവീക്ഷണവും അടിസ്ഥാനമാക്കി എഴുതിയ ‘ഫൈസലയേ ഹഫ്ത് മസ്‌അലാ’ എന്ന ഇന്ന് ലഭ്യതകുറഞ്ഞ ഈ ചെറിയ ഗ്രന്ഥം നമ്മുടെ സമൂഹത്തിൽ സമാധാനവും സന്തുലിതാവസ്ഥയും നവീകരണവും ഉണ്ടാക്കട്ടെ; ഇൻശാ അല്ലാഹ്!
കഴിഞ്ഞ നൂറ്റാണ്ടിന്റെ പരിഷ്കർത്താവായി അല്ലാഹു നിശ്ചയിച്ചവരാണ് ഹാജി ഇംദാദുല്ലാഹ് മുഹാജിർ മക്കി(റ) എന്ന് ആ ജീവിതം സാക്ഷ്യപ്പെടുത്തിയിട്ടുണ്ട്. നേർവഴി കാണിക്കുക, ജ്ഞാനം പകർന്നു നൽകാനുള്ള വിദ്യാഭ്യാസ സംവിധാനങ്ങൾ സ്ഥാപിക്കുക, മനസ്സിനെ സംസ്കരിക്കുക, മനുഷ്യമനസ്സുകളിൽ അല്ലാഹുവിനോടും റസൂൽ(സ്വ) തങ്ങളോടുമുള്ള യഥാർത്ഥ സ്നേഹം നിറയ്ക്കുക തുടങ്ങിയ സൽക്കർമ്മങ്ങളിൽ അവർ പ്രഗത്ഭരായിരുന്നു. അതിനാൽ മറ്റുള്ളവർക്ക് ചെയ്യാൻ കഴിയാത്ത വലിയ നേട്ടങ്ങൾ അല്ലാഹു അവർക്ക് എളുപ്പമാക്കി കൊടുത്തു. ഈ ഭാഗ്യം ലഭിച്ച ശൈഖ് അവർകൾ സ്വന്തം അനുഭവങ്ങളും ദീർഘവീക്ഷണവും അടിസ്ഥാനമാക്കി എഴുതിയ ‘ഫൈസലയേ ഹഫ്ത് മസ്‌അലാ’ എന്ന ഇന്ന് ലഭ്യതകുറഞ്ഞ ഈ ചെറിയ ഗ്രന്ഥം നമ്മുടെ സമൂഹത്തിൽ സമാധാനവും സന്തുലിതാവസ്ഥയും നവീകരണവും ഉണ്ടാക്കട്ടെ; ഇൻശാ അല്ലാഹ്!
ഈ ഗ്രന്ഥത്തെക്കുറിച്ച് ചില കാര്യങ്ങൾ…
ഈ ഗ്രന്ഥത്തിലെ ഓരോ വരിയും വളരെ പ്രയോജനപ്രദമായ രീതിയിലാണ് തയ്യാറാക്കിയിരിക്കുന്നത്. പ്രത്യേകിച്ച്, ആമുഖവും ഉപസംഹാരവും ഏറെ പ്രധാനപ്പെട്ടവയാണ്. ഈ ഗ്രന്ഥം മുന്നോട്ടുവെക്കുന്ന ചില പ്രധാന ആശയങ്ങൾ:
അനാവശ്യ തർക്കങ്ങൾ ഒഴിവാക്കണം.
ഉപശാഖാ നിയമങ്ങളിൽ അനാവശ്യമായി കടുംപിടുത്തം കാണിക്കുന്നത് സമൂഹത്തിലെ പ്രമുഖരുടെയും പണ്ഡിതന്മാരുടെയും വിലപ്പെട്ട സമയം പാഴാക്കും. ഇത് പൊതുജനങ്ങൾക്കിടയിൽ ദീനീ കാര്യങ്ങളിൽ അനാവശ്യ സംശയങ്ങൾക്കും ആശയക്കുഴപ്പങ്ങൾക്കും വഴിവെക്കും.
സമൂഹത്തിലെ എല്ലാ പ്രശ്നങ്ങളും പൂർണ്ണമായി വിശകലനം ചെയ്ത് തീർപ്പുകൽപ്പിക്കാൻ ശ്രമിക്കുന്നത് അസാധ്യവും തികച്ചും ആവശ്യമില്ലാത്ത കാര്യവുമാണ്.
ഈ ഗ്രന്ഥം മദ്ഹബുകളെ അംഗീകരിച്ചും, നല്ലവരെ ആദരിച്ചും, പാരമ്പര്യ രീതിയിൽ നിലകൊള്ളുന്ന അഹ്‌ലുസ്സുന്ന വൽ ജമാഅത്തിന് വേണ്ടി രചിക്കപ്പെട്ടതാണ്.
ഭൂരിഭാഗം സമയത്തും തർക്കിക്കുന്ന രണ്ട് കൂട്ടാരുടെയും വാദങ്ങളുടെ അന്തസ്സത്ത ഒന്നുതന്നെയാണ്; എന്നാൽ പലരും അത് മനസ്സിലാക്കുന്ന രീതി വ്യത്യസ്തമാണെന്ന് നിഷ്പക്ഷമായി ചിന്തിച്ചാൽ ബോധ്യമാകും. ഭൂരിഭാഗം പ്രശ്നങ്ങൾക്കും കാരണം യാഥാർത്ഥ്യങ്ങൾ ശരിയായ രീതിയിൽ മനസ്സിലാക്കാത്തതാണ്.
മുൻധാരണകളോടെയും, എങ്ങനെയെങ്കിലും എതിർക്കണം എന്ന ചിന്തയോടെയും ഈ ഗ്രന്ഥത്തെ സമീപിക്കുന്നവർക്ക് ഇതിൽ നിന്ന് യാതൊരു പ്രയോജനവുമില്ല.
ദീനിൽ ഫർള്, സുന്നത്ത്, ഹറാം, മക്റൂഹ് എന്നിവയിൽ പെടാത്ത – മുബാഹായ (അനുവദനീയമായ) ഏതെങ്കിലും ഒരു കാര്യത്തെ മേൽപ്പറഞ്ഞ നിയമങ്ങളിൽ പെട്ടതായി ചിത്രീകരിക്കാൻ പാടില്ല.
സാധാരണ മുസ്ലീങ്ങളെക്കുറിച്ച് നല്ല വിചാരം ഉണ്ടായിരിക്കണം. ആഴത്തിൽ അന്വേഷിക്കാതെ, തിടുക്കപ്പെട്ട് ആരെയും ബിദ്അത്തുകാരൻ എന്നോ ശിർക്ക് ചെയ്യുന്നവൻ എന്നോ മുദ്രകുത്താൻ പാടില്ല.
സാധാരണക്കാർ ചെയ്യുന്ന തെറ്റുകളെ മൃദുവായ രീതിയിൽ, സ്നേഹത്തോടെ ചൂണ്ടിക്കാണിച്ചു തിരുത്താൻ ശ്രമിക്കണം. സാധാരണക്കാരുടെ പ്രവൃത്തികളെയും പണ്ഡിതന്മാരുടെയും ഔലിയാക്കളുടെയും പ്രവൃത്തികളെയും തുലനം ചെയ്യുകയോ ഒരേ പോലെ കാണുകയോ ചെയ്യരുത്.
എല്ലാറ്റിനുമുപരിയായി നമ്മുടെ ഇരുലോക ജീവിതം മുൻനിർത്തി, യാതൊരു പ്രയോജനവുമില്ലാത്ത വ്യർത്ഥ തർക്കങ്ങൾ ഒഴിവാക്കണം. ഔലിയാക്കളെ തേടിപ്പിടിച്ച് അവരുടെ സഹവാസത്തിൽ പങ്കുചേർന്ന് മനസ്സിനെ ശുദ്ധീകരിക്കാനും, അന്തരംഗം വിശുദ്ധമാക്കാനും ശ്രമിക്കണം. അകമേ ശുദ്ധമായാൽ കാര്യങ്ങളെല്ലാം വ്യക്തമാകും.
അല്ലാഹു നമ്മുടെ ഉദ്ദേശ്യങ്ങളെയും കർമ്മങ്ങളെയും വിശുദ്ധമാക്കി, നമ്മുടെ ഓരോ ചലനങ്ങളും അവന് പൊരുത്തമുള്ളതായി സ്വീകരിക്കുമാറാകട്ടെ.
അൻവാറുൽ ബാഖിയാത്ത് കൾച്ചറൽ ഡവലപ്മെന്റ് സെന്റർ
തുടരും…
