അവാരിഫുൽ മആരിഫ്:
ഇമാം ശിഹാബുദ്ദീൻ സുഹ്റ വർദി(റ):
അല്ലാഹുവിന്റെ സ്മരണകളിലും ആരാധനകളിലുമായി സ്വൂഫി കേന്ദ്രങ്ങളിൽ അധിവസിക്കുന്ന സാധകരായ സ്വൂഫികളുടെ ശ്രേഷ്ഠതയെയും മഹത്വത്തെയും വിവരിക്കുന്ന അദ്ധ്യായം.
മുഴുവൻ സമയവും ഇബാദത്തിന്നു നീക്കിവെച്ചു കൊണ്ട് ഒരു ഇബാദത്തു പുരയിൽ ഒന്നിച്ചു താമസിക്കുന്ന സൂഫികൾക്ക്, ‘അഹ് ലുറുബാത്ത്’ (ആശ്രമവാസികൾ) എന്നു പറയുന്നു. ‘അഹ്‌ലുറുബാത്ത്’ എന്ന ശബ്ദത്തിന്ന് അർത്ഥം, ശത്രുവിനെതിരെ കുതിരപ്പടയെ ഒരുക്കിനിർത്തിയവർ എന്നാണ്. തന്നിഷ്ടങ്ങളാകുന്ന ശത്രുക്കൾക്കെതിരെയാണിവർ കുതിരപ്പടയെ ഒരുക്കി നിർത്തിയിരിക്കുന്നത്.
“…….ചില ഭവനങ്ങളിൽ-ആ ഭവനങ്ങൾ ഉയർത്തപ്പെടാനും, അവിടെവെച്ചു തന്റെ നാമം സ്മരിക്കപ്പെടാനും അല്ലാഹു ഇച്ഛിച്ചു. അവിടെവെച്ചു പ്രഭാത ത്തിലും പ്രദോഷത്തിലും, പൗരുഷമുള്ള ചിലർ അവനെ പ്രകീർത്തിക്കുന്നു. അല്ലാഹുവിന്റെ ദിക്റിന്നും നിസ്കാരം നിലനിർത്തുന്നതിനും, സക്കാത്തുകൊടുക്കുന്നതിനും, അവർക്ക് കച്ചവട വ്യാപാരങ്ങളൊന്നും തടസ്സമാവുകയില്ല. ഹൃദയങ്ങളും, ദൃഷ്ടികളും ഇളകിമറിയുന്ന ഒരു ദിവസത്തെ അവർ ഭയപ്പെടുന്നു.”
ഉദ്ധൃത സൂക്തത്തിൽ ‘ഭവനങ്ങളിൽ’ എന്ന ശബ്ദത്തിന്ന് ഒന്നിലധികം വ്യാഖ്യാനമുണ്ട്. പള്ളികൾ, നബി(സ) യുടെ വീടുകൾ, മദീനയിലെ വീടുകൾ എന്നൊക്കെ വ്യാഖ്യാനങ്ങളുണ്ട്.
ഈ സൂക്തം അവതരിപ്പിച്ചപ്പോൾ സ്വിദ്ദീഖ്(റ) എഴുന്നേറ്റു നിന്ന് നബി(സ) യോടു ചോദിച്ചു: നബിയേ, ഈ ഭവനങ്ങളിൽ അലി(റ) വിന്റെയും, ഫാത്തിമാ(റ) യുടെയും വീടുകൾ പെടുമോ? നബി(സ) പ്രതിവചിച്ചു. ഉവ്വ് അവയിൽ പ്രധാനപ്പെട്ട വീടാണത്. അല്ലാഹു ഭൂമി മുഴുവൻ നബി(സ) തങ്ങൾക്ക് സുജൂദു ചെയ്യാൻ പറ്റുന്ന സ്ഥലമാക്കിക്കൊടുത്തിരിക്കുന്നു. ഹസൻ(റ) പറയുന്നു. ഇതനുസരിച്ച്, പ്രസ്തുത സൂക്തത്തിൽ പറഞ്ഞ ‘പൗരുഷമുള്ളവർ’ എവിടെയുണ്ടോ അവിടെയെല്ലാം ആ ഭവനങ്ങളുണ്ട്.
നബി(സ) അരുളിയതായി അനസുബിൻ മാലിക്(റ) പറയുന്നു. ഓരോ പ്രഭാതത്തിലും പ്രദോഷത്തിലും ഭൂവിഭാഗങ്ങൾ അന്യോന്യം ചോദിക്കും: “വല്ലവനും ഇന്നു നിന്നിൽ വെച്ച് ദിക്‌റോ, നിസ്‌കാരമോ നിർവ്വഹിക്കുകയുണ്ടായോ?” എന്ന്. ചില ഭൂവിഭാഗങ്ങൾ പറയും “ഉവ്വ്”, ചിലത് “ഇല്ല” എന്നും. ഉവ്വ് എന്ന് പറഞ്ഞ വിഭാഗം, ഇല്ല എന്നു പറഞ്ഞ വിഭാഗത്തിനുമേൽ അഭിമാനം നടിച്ചു പുളകമണിയും. മാത്രമല്ല, തൻ്റെ മുകളിൽ വെച്ചു ദിക്‌റോ, നിസ്‌കാരമോ നിർവ്വഹിച്ച മനുഷ്യന്നു വേണ്ടി അല്ലാഹുവിങ്കൽ അതു സാക്ഷി നില്ക്കുകയും ആ മനുഷ്യൻ ഇഹലോകവാസം വെടിയുമ്പോൾ ആ ഭൂതലം കരയുകയും ചെയ്യും. അതുകൊണ്ടാണ് ദുർജനങ്ങളെ പറ്റി പരിശുദ്ധ ഖുർആൻ ഇപ്രകാരം പറഞ്ഞത്:
“ആകാശഭൂമികൾ അവർക്കു വേണ്ടി കരയുകയില്ല” എന്ന്.
ഭൗതിക സുഖങ്ങളിൽ നിന്ന് അകന്ന് അല്ലാഹുവിനെ ആരാധിക്കാൻ വേണ്ടി ഒന്നിച്ചു ചേർന്ന് സ്വൂഫി കേന്ദ്രങ്ങളിൽ(ഖാൻഖാഹുകൾ, റുബാതുകൾ, സാവിയകൾ) ജീവിതം നയിക്കുന്നവർ പ്രസ്തുത പരിശുദ്ധ ഖുർആൻ സൂക്തത്തിൽ പറഞ്ഞ ‘പൗരുഷമുള്ളവരി’ൽ പെടുന്നു. ഇങ്ങിനെ ദുനിയാവിനെ ‘ത്വലാഖ്’ ചൊല്ലി സ്വൂഫി കേന്ദ്രങ്ങളിൽ ജീവിതം തെരഞ്ഞെടുക്കുന്ന യഥാർത്ഥ സ്വൂഫികൾക്ക് ദുനിയാവിനെക്കൊണ്ട് അല്ലാഹു പാദസേവ ചെയ്യിക്കുന്നു.
നബി(സ) മൊഴിഞ്ഞതായി ഇംറാനുബ്‌നു ഹുസൈൻ(റ) പറയുന്നു:
“വല്ലവനും അല്ലാഹുവിങ്കലേക്ക് കടപറിഞ്ഞു വീണാൽ, അയാൾ വിചാരിക്കാത്ത വഴിയിലൂടെ ഭക്ഷണ ചിലവുകൾ അല്ലാഹു നൽകും. വല്ലവനും ദുനിയാവിലേക്കു കടപറിഞ്ഞു വീണാൽ അയാളെ അല്ലാഹു ദുനിയാവിൻ്റെ കൈയിലേൽപിച്ചു കൊടുക്കുകയും ചെയ്യും.”
ഇങ്ങിനെ അഹ് ലു റുബാത്ത് ജീവിതം നയിക്കുന്ന സ്വൂഫികൾ നാടിൻ്റെ തണൽ മരങ്ങളാണ്. നാടിന് മുഴുവൻ രക്ഷയാണവർ. ഇബ്‌നു ഉമറിൽ നിന്നുള്ള റിപ്പോർട്ടിൽ നബി(സ) അരുളുന്നു:
“സുകൃതവാനായ മുസ്‌ലിമായ മനുഷ്യൻ, തൻ്റെ ബന്ധുക്കളും അയൽക്കാരുമായ നൂറുപേർക്ക് ആപത്തുകൾ വരാതെ തടുക്കുന്നു.”
നബി(സ) തുടരുന്നു:
“അല്ലാഹുവിൻ്റെ മുമ്പിൽ കുമ്പിടുന്ന ദാസരും, മുലകുടി പ്രായത്തിലുള്ള കുഞ്ഞുങ്ങളും മേഞ്ഞു തിന്നുന്ന മൃഗങ്ങളും ഭൂമുഖത്തില്ലായിരു ന്നുവെങ്കിൽ ദുഷ്ടജനങ്ങളിൽ കഠിന കഠോരമായ ശിക്ഷ അല്ലാഹു പെട്ടെന്നു വർഷിപ്പിക്കുകയും എന്നിട്ടു അവരെ തകർത്തു തരിപ്പണമാക്കുകയും ചെയ്യുമായിരുന്നു.”
നബി(സ) അരുളിയതായി ജാബിർ(റ) റിപ്പോർട്ട് ചെയ്യുന്നു:
“ഒരു മനുഷ്യൻ്റെ നന്മ മൂലം അല്ലാഹു അയാളുടെ മക്കളെയും പേരക്കുട്ടികളെയും, ചുറ്റുഭാഗത്തു താമസിക്കുന്നവരെയും നന്മയിലേക്കു നയിക്കാനിടയുണ്ട്. ആ നല്ല മനുഷ്യൻ അവരിലുള്ള കാലത്തോളം അവരെല്ലാം അല്ലാഹുവിന്റെ കാവലിലായിരിക്കും.”
നബി(സ) അരുളിയതായി ജാബിർ(റ) റിപ്പോർട്ട് ചെയ്യുന്നു:
“ഒരു മനുഷ്യൻ്റെ നന്മ മൂലം അല്ലാഹു അയാളുടെ മക്കളെയും പേരക്കുട്ടികളെയും, ചുറ്റുഭാഗത്തു താമസിക്കുന്നവരെയും നന്മയിലേക്കു നയിക്കാനിടയുണ്ട്. ആ നല്ല മനുഷ്യൻ അവരിലുള്ള കാലത്തോളം അവരെല്ലാം അല്ലാഹുവിന്റെ കാവലിലായിരിക്കും.”
ശൈഖ് ദാവുദൂബിൻ സാലിഹ്(റ) പറയുന്നു:
“അബൂസൽമ(റ) എന്നോടൊരിക്കൽ ചോദിച്ചു:
“സഹോദര പുത്രാ, നിങ്ങൾ കുതിര കെട്ടി യുദ്ധത്തിന്നൊരുങ്ങിയിരിക്കുക” എന്ന പരിശുദ്ധ ഖുർആൻ വചനത്തിൻ്റെ ആശയമെന്തെന്ന് നിനക്കറിയാമോ?”*
ഞാൻ പറഞ്ഞു: “അറിയില്ല”
അദ്ദേഹം അരുളി:
“സഹോദരപുത്രാ നബി(സ) യുടെ കാലത്ത് കുതിർപ്പടയെ യുദ്ധത്തിന്നൊരുക്കി നിർത്തുന്ന സമ്പ്രദായമുണ്ടായിരുന്നില്ല. അതിൽ പ്രസ്തുത സൂക്ത ത്തിന്റെ ആശയം ഒരു നിസ്കാരം കഴിഞ്ഞാൽ അടുത്ത നിസ്‌കാരത്തിന് തയ്യാറെടുത്തു കാത്തിരിക്കുക എന്നാകുന്നു. തന്നിഷ്‌ടത്തിൻ്റെ കേദാരമായ നഫ്സിനോടുള്ള പോരാട്ടമാണല്ലൊ നിസ്കാരം….”
ഈ പോരാട്ടത്തിന്നു ഒരുങ്ങിത്തയ്യാറെടുത്തിരിക്കുന്നവരാണ് സ്വൂഫി കേന്ദ്രങ്ങളിൽ അധിവസിക്കുന്ന അന്തേവാസികളായ സ്വൂഫികൾ.
പരിശുദ്ധ ഖുർആൻ പറയുന്നു:
“അല്ലാഹുവിൻ്റെ വഴിയിൽ പോരാടേണ്ട ക്രമപ്രകാരം പോരാടുക.”
ഈ പോരാട്ടത്തെ അബ്‌ദുല്ലാഹിബ്‌നു മുബാറക്(റ) വ്യാഖ്യാനിച്ചതിങ്ങിനെയാണ്;
“നഫ്സിനോടും, തന്നിഷ്ടത്തോടുമുള്ള പോരാട്ടം, അതാണ് യഥാർത്ഥ ജിഹാദ്. ഏറ്റവും വലിയ പോരാട്ടവും അതു തന്നെ.
ഒരു യുദ്ധം കഴിഞ്ഞു തിരിച്ചെത്തിയ സഹാബികളോടു നബി(സ) അരുളി:
“ചെറിയ പോരാട്ടമാണ് കഴിഞ്ഞത്. വലിയ ജിഹാദിലേക്കു(സ്വന്തം നഫ്സിനോടുള്ള) നാം തിരിച്ചെത്തിയിരിക്കുന്നു.”
സ്വൂഫി കേന്ദ്രത്തിൽ അന്തേവാസിയായ ഒരു സ്വൂഫിവര്യനെ തൻ്റെ സഹോദരൻ സൈന്യത്തിൽ ചേരാൻ ക്ഷണിച്ചു. സ്വൂഫി പറഞ്ഞു:
“സഹോദരാ, ശത്രുക്കളുടെ പ്രവേശന മാർഗ്ഗങ്ങളെല്ലാം എൻ്റെ ആശ്രമത്തിന്നു ചുറ്റും ഒരുമിച്ചു കൂടിയിരിക്കുന്നു. ആശ്രമത്തിന്റെ കവാടമാകട്ടെ ഭദ്രമായി അടക്കപ്പെട്ടതുമാണ്.”
അപ്പോൾ സഹോദരൻ ചോദിച്ചു:
“താങ്കളെപ്പോലെ എല്ലാവരും വിചാരിച്ചാൽ ശത്രുക്കൾ നമ്മെ തുരത്തുകയില്ലേ?”
സ്വൂഫി പ്രതിവചിച്ചു:
“സഹോദരാ ഇല്ല. ഞാൻ ചെയ്യുന്നതു പോലെ മുസ്‌ലിംകളെല്ലാവരും തങ്ങളുടെ ‘മുസ്വല്ല’കളിൽ ഇരുന്നു ‘അല്ലാഹു അക്‌ബർ’ എന്ന പ്രകീർത്തനം ഉരുക്കഴിക്കുകയാണെങ്കിൽ കോൺസ്റ്റാന്റിനോപ്പിളിൻ്റെ അതിർത്തികൾ നമുക്കു മുമ്പിൽ വെറുതെ പൊളിഞ്ഞു വീഴുന്നതുകാണാം.”(ഇവിടെ വിശ്വാസപൂർവ്വം അല്ലാഹുവിൽ ഭരമേൽപിച്ചവന് അല്ലാഹു മതി എന്ന ആശയമാണ് ധ്വനിപ്പിക്കുന്നത്. നിർണായക സന്ദർഭങ്ങളിൽ അനിവാര്യമാകുന്ന അല്ലാഹുവിന്റെ മാർഗത്തിലുള്ള അദ്ധ്വാനപരിശ്രമങ്ങളെ പാടെ നിരാകരിക്കുന്ന സമീപനത്തിന് സാധൂകരണമല്ല ഇതെന്ന് സവിശേഷം ഓർമ്മിക്കേണ്ടതുണ്ട്.)
ഒരു ജ്ഞാനി പറയുന്നു:
“ഇഖ്‌ലാസോടു കൂടി, ഇബാദത്തു പുരകളിൽ നിന്നുയരുന്ന ശബ്ദത്തിന്റെ ശക്തി അപാരമാണ്. കറങ്ങിക്കൊണ്ടിരിക്കുന്ന പ്രപഞ്ചഗോളങ്ങൾക്കു നേരിടുന്ന തടസ്സങ്ങൾ നീക്കാൻ പോലും ആ ശബ്‌ദത്തിന്നു കഴിയും. അത്തരം സ്വൂഫി കേന്ദ്രങ്ങൾ സ്ഥിതി ചെയ്യുന്ന നാടിനു തന്നെ അതൊരു രക്ഷാ കവചമാണ്. നിങ്ങൾ ക്ഷമിക്കുകയും, അന്യോന്യം ക്ഷമ ഉപദേശിക്കുകയും, കുതിരകെട്ടിപ്പാർക്കുകയും ചെയ്യുക” എന്ന പരിശുദ്ധ ഖുർആൻ വാക്യത്തെ വ്യാഖ്യാനിച്ചു കൊണ്ട് ശൈഖു സിർരിയ്യുസിഖ്‌തി(റ) പറയുന്നു:
“ഇവിടെ ക്ഷമ കൊണ്ടു വിവക്ഷിതം ഭൗതിക സുഖങ്ങൾ ത്യജിക്കാനുള്ള ക്ഷമയാണ്. ക്ഷമകൊണ്ടുപദേശിക്കുക എന്നതിന്റെ വിവക്ഷിതം പടക്കളത്തിൽ ഉറച്ചു നിൽക്കാൻ പരസ്‌പരം ഉപദേശിക്കലാണ്. ‘കുതിരകെട്ടിപ്പാർക്കുക’ എന്നതിൻ്റെ ആശയം തന്നിഷ്ടങ്ങളോടു പോരാടാൻ ഒരുങ്ങിയിരിക്കുക എന്നതാണ്.” ഇതാണ് അഹ്‌ലുറുബാത്ത് ചെയ്യുന്നത്.
മനുഷ്യന്റെ ശത്രുവാണ് തന്നിഷ്ടം. ശത്രുഭൂമിയാണ് ശരീരം. ഈ ശത്രുഭൂമിയിൽ കുതിരകെട്ടിപ്പാർക്കുകയാണ് സ്വൂഫി കേന്ദ്രങ്ങളിൽ അന്തേവാസികളായ സ്വൂഫികൾ ചെയ്യുന്നത്. വേറെ യാതൊരു ചിന്തയും അവർക്കില്ല. ഭൗതിക ബന്ധങ്ങളെല്ലാം ഇതിന്നു വേണ്ടി ത്യജിച്ചിരിക്കുന്നു. ഭക്ഷ്യപ്രശ്‌നം പോലും അവരെ അലട്ടുന്നില്ല. അതവർ അല്ലാഹുവിങ്കൽ ‘തവക്കുൽ’ ചെയ്‌തിരിക്കുന്നു. അഹോരാത്രം ഇബാദത്തിൽ മുഴുകുക യാണവർ ചെയ്യുന്നത്. ഒരു നിമിഷവും പാഴാക്കാതെ ശത്രുവിനെ കീഴടക്കാൻ അവർ പൊരുതുന്നു. ജീവൻ മരണപ്പോരാട്ടം! അലിയ്യുബ്നി അബൂതാലിബ്(റ) നബി(സ) യിൽ നിന്നു റിപ്പോർട്ട് ചെയ്യുന്നു:
“വിഷമമുള്ളപ്പോഴും സമ്പൂർണ്ണമായ വുളു ചെയ്ത് പള്ളിയിലേക്കു നടന്നു ചെന്ന് ഒരു നിസ്കാരത്തിന്നു ശേഷം മറ്റൊരു നിസ്കാരത്തിന്നു വേണ്ടി കാത്തിരിക്കുക എന്നത് എല്ലാ പാപമാലിന്യങ്ങളേയും കഴുകികളയുന്ന സുകൃതമാണ്.”
മറ്റൊരു റിപ്പോർട്ടിലുള്ളത് ഇങ്ങിനെയാണ്. നബി(സ) ചോദിച്ചു:
“നിങ്ങളുടെ പാപങ്ങൾ മായ്ച്ചു കളയുകയും, പദവികൾ ഉയർത്തുകയും ചെയ്യുന്ന ഒരു സുകൃതം നിങ്ങൾക്കു ഞാൻ പറഞ്ഞു തരട്ടെയോ?”
സഹാബികൾ പ്രതിവചിച്ചു:
“അല്ലാഹുവിന്റെ റസൂലേ പറഞ്ഞു തന്നാലും!”
നബിയരുളി:
“വിഷമമുണ്ടെങ്കിലും സമ്പൂർണ്ണമായ വുളു ചെയ്‌തു ദീർഘദൂരം നടന്നു പള്ളിയിൽ ചെന്ന്, ഒരു നിസ്കാരത്തിന്നു ശേഷം മറ്റൊരു നിസ്കാരത്തിന്നു വേണ്ടി കാത്തിരിക്കൽ. അതു തന്നെയാണ് കുതിരകെട്ടിപ്പാർക്കൽ. സംശയമില്ല. അതാണ് കുതിരകെട്ടിപ്പാർക്കൽ എന്നറിഞ്ഞു കൊൾക.”