ബഷീർ മുളിവയൽ.
മനുഷ്യന്റെ അവയവങ്ങളിൽ
ഏറെ വ്യത്യസ്തനാണ് മുഖം
കൈകളെപ്പോലെ എല്ലാരേയും തൊടില്ല
വാരിക്കോരികൊടുക്കില്ല
ആരെയും പ്രഹരിക്കില്ല
കാലുകളെപ്പോലെ
ഒന്നിലേക്കും ഓടി അടുക്കില്ല.
ആരിൽ നിന്നും ഓടി ഒളിക്കില്ല.
ആരെയും ചവിട്ടി നോവിക്കില്ല.
ഒന്നും കീഴിലാക്കണമെന്ന ആഗ്രഹമില്ല.
തൊടുന്നുണ്ടെങ്കിൽ സ്നേഹത്തോടെ മൃദുലമായ ചുംബനം
സങ്കടത്തിൽ കണ്ണുകൾ നിറയുന്ന ആർദ്രത
എത്ര മൗനമായാണ് ശ്വാസോച്ഛോസത്തിലൂടെ ജീവനെ നിലനിർത്തുന്നത്.
എന്ത് വശ്യമായാണ് പുഞ്ചിരികൊണ്ട്
മറ്റെല്ലാ ജീവികളിൽ നിന്നും മനുഷ്യനെ ഉന്നതനാക്കുന്നത്.
എങ്കിലും അവയവങ്ങളിൽ വില്ലനാണ് മുഖം
ഒരു പുഞ്ചിരികൊണ്ട് മറച്ചു കളഞ്ഞേക്കും വലിയ ചതിക്കുഴികളെ
മൗനം കൊണ്ടോ, മധുര വാക്കുകൾ കൊണ്ടോ അടച്ചു വെച്ചേക്കും
പകയുടെ തീക്കുണ്ഡങ്ങളെ.
കണ്ടിട്ടും കണ്ടില്ലെന്ന് നടിക്കുന്ന
പറഞ്ഞത് പറഞ്ഞില്ലെന്ന് പറയുന്ന
സ്വഭാവം മുഖത്തിനല്ലാതെ മറ്റൊരവയവത്തിനുമില്ല.