ഹബീബ് അബ്ദുല്ലാഹിബ്നു അലവിബ്നു മുഹമ്മദ് അൽ-ഹദ്ദാദ് (റ)
പ്രമുഖ ബാ അലവി സ്വൂഫി ബഹുമാനപ്പെട്ട ഹബീബ് അബ്ദുല്ലാഹിബ്നു അലവിബ്നു മുഹമ്മദ് അൽ-ഹദ്ദാദ് (റ) യുടെ രിസാലത്തുൽ മുആവനത്തി വൽ-മുളാഹറത്തി വൽ-മുആസറത്തി ലിർ-റാഗിബീന മിനൽ മുഅ്മിനീന ഫീ സുലൂക്കി ത്വരീഖിൽ ആഖിറഃ എന്ന ഗ്രന്ഥത്തിന്റെ മലയാള പരിഭാഷ ആരംഭിക്കുന്നു. സ്വൂഫിമാർഗത്തിൽ സഞ്ചരിക്കുന്ന ഓരോ സാലിക്കിനും വഴികാട്ടിയായ ഈ ഗ്രന്ഥം ഇസ് ലാമിക വിജ്ഞാനലോകത്ത് ഏറെ വിഖ്യാതമായതാണ്.

ഗ്രന്ഥകാരനെ കുറിച്ച്:
നമ്മുടെ നേതാവും മഹാ പണ്ഡിതനും വാക്കാലും പ്രവൃത്തിയാലും അല്ലാഹുവിലേക്ക് ക്ഷണിക്കുന്നവരും മാർഗദർശനത്തിന്റെ ധ്രുവവുമായ അൽ-ഹബീബ് അബ്ദുല്ലാഹിബ്നു അലവിബ്നു മുഹമ്മദ് അൽ-ഹദ്ദാദ് (റ) ഹിജ്റ 1044 സഫർ മാസം 5-ന് വ്യാഴാഴ്ച രാത്രി ഹള്റമൗത്തിലെ തരീം നഗരത്തിന്റെ പ്രാന്തപ്രദേശമായ ‘അസ്സുബൈർ’ എന്ന സ്ഥലത്ത് ജനിച്ചു. തരീമിലാണ് അദ്ദേഹം വളർന്നത്. ചെറുപ്പത്തിൽ തന്നെ അദ്ദേഹത്തിന് കാഴ്ചശക്തി നഷ്ടപ്പെട്ടെങ്കിലും അല്ലാഹു അദ്ദേഹത്തിന് ഉൾക്കാഴ്ചയുടെ (ബസ്വീറത്ത്) പ്രകാശം പകരം നൽകി. ഉപകാരപ്രദമായ വിജ്ഞാനങ്ങൾ തേടുന്നതിൽ അദ്ദേഹം കഠിനമായി പരിശ്രമിക്കുകയും തന്റെ കാലഘട്ടത്തിലെ പണ്ഡിതന്മാരുമായി നിരന്തരം സഹവസിക്കുകയും ചെയ്തു.
അദ്ദേഹത്തിന്റെ പ്രധാന ഗുരുനാഥന്മാരിൽ പ്രമുഖർ അൽ-ഹബീബ് ഉമർ ബിൻ അബ്ദുറഹ്മാൻ അൽ-അത്വാസ്(റ), അൽ-ഹബീബ് അല്ലാമ അഖീൽ ബിൻ അബ്ദുറഹ്മാൻ അസ്സഖാഫ്(റ), അൽ-ഹബീബ് അല്ലാമ അബ്ദുറഹ്മാൻ ബിൻ ശൈഖ് ഐദീദ്(റ), അൽ-ഹബീബ് അല്ലാമ സഹ്ൽ ബിൻ അഹ്മദ് ബാഹസൻ അൽ-ഹുദൈലി ബാഅലവി(റ) എന്നിവരാണ്. മക്കത്തുൽ മുക്കറമയിലെ മഹാ പണ്ഡിതനായിരുന്ന അസ്സയ്യിദ് മുഹമ്മദ് ബിൻ അലവി അസ്സഖാഫും(റ) അദ്ദേഹത്തിന്റെ ഗുരുനാഥന്മാരിൽ ഉൾപ്പെടുന്നു.
തുടർന്ന്, തത്ത്വജ്ഞാനത്തോടും (ഹിക്മത്ത്) സദുപദേശത്തോടും കൂടി അല്ലാഹുവിലേക്ക് ക്ഷണിക്കുന്നതിനും മാർഗദർശനം നൽകുന്നതിനുമായി അല്ലാഹു അദ്ദേഹത്തെ നിയോഗിച്ചു. ജനങ്ങൾ അദ്ദേഹത്തിലേക്ക് ആകർഷിക്കപ്പെടുകയും വിവിധ നാടുകളിൽ അദ്ദേഹത്തിന്റെ പ്രശസ്തി പരക്കുകയും ചെയ്തു. അടുത്തവരും അകന്നവരുമായ അനേകം ആളുകൾ അദ്ദേഹത്തിൽ നിന്ന് പ്രയോജനം നേടി. അല്ലാഹു അദ്ദേഹത്തിലൂടെ അനേകം ആളുകൾക്ക് നന്മ നൽകുകയും വൻ ജനാവലിക്ക് സന്മാർഗം കാണിക്കുകയും ചെയ്തു. എല്ലായിടത്തും അദ്ദേഹത്തിന്റെ പ്രബോധനം വ്യാപിക്കുകയും അദ്ദേഹത്തിന്റെ ഉപദേശങ്ങളിൽ നിന്നും ഗ്രന്ഥങ്ങളിൽ നിന്നും ജനങ്ങൾ പ്രയോജനം കരസ്ഥമാക്കുകയും ചെയ്തു. അനേകം ആളുകൾ അദ്ദേഹത്തിൽ നിന്ന് വിജ്ഞാനം സ്വീകരിച്ചു.
അദ്ദേഹത്തിന്റെ പ്രമുഖ ശിഷ്യന്മാരിൽ അദ്ദേഹത്തിന്റെ പുത്രൻ അൽ-ഹബീബ് ഹസൻ ബിൻ അബ്ദുല്ലാഹി അൽ-ഹദ്ദാദ്(റ), അൽ-ഹബീബ് അഹ്മദ് ബിൻ സൈൻ അൽ-ഹബശി(റ), അൽ-ഹബീബ് അബ്ദുറഹ്മാൻ ബിൻ അബ്ദുല്ലാഹ് ബൽഫഖീഹ്(റ), സൈൻ ബിൻ സുമൈത്വിന്റെ പുത്രന്മാരായ അൽ-ഹബീബ് മുഹമ്മദ്, അൽ-ഹബീബ് ഉമർ, അൽ-ഹബീബ് ഉമർ ബിൻ അബ്ദുറഹ്മാൻ അൽ-ബാർ(റ), അൽ-ഹബീബ് അലി ബിൻ അബ്ദുല്ലാഹ് ബിൻ അബ്ദുറഹ്മാൻ അസ്സഖാഫ്(റ), അൽ-ഹബീബ് മുഹമ്മദ് ബിൻ ഉമർ ബിൻ ത്വാഹ അസ്സ്വാഫി അസ്സഖാഫ്(റ) തുടങ്ങി അനേകം മഹത്തുക്കൾ ഉൾപ്പെടുന്നു.
ഉപദേശങ്ങളും തത്ത്വജ്ഞാനങ്ങളും സമാഹരിച്ച അനേകം ഗ്രന്ഥങ്ങൾ അദ്ദേഹത്തിന്റേതായിട്ടുണ്ട്. അവയ്ക്ക് വലിയ പ്രചാരവും സ്വീകാര്യതയും സ്നേഹവും ലഭിക്കുകയും അല്ലാഹു അവയിലൂടെ ജനങ്ങൾക്ക് ഉപകാരം ചെയ്യുകയും ചെയ്തു. ആധുനിക കാലത്ത് ഇംഗ്ലീഷ്, ഫ്രഞ്ച് തുടങ്ങിയ വിദേശ ഭാഷകളിലേക്കും അദ്ദേഹത്തിന്റെ ചില ഗ്രന്ഥങ്ങൾ വിവർത്തനം ചെയ്യപ്പെട്ടിട്ടുണ്ട്.
അദ്ദേഹത്തിന്റെ ഗ്രന്ഥങ്ങൾ പരിചയപ്പെടുത്തേണ്ട ആവശ്യമില്ലാത്ത വിധം ചെറിയവർക്കും വലിയവർക്കുമിടയിൽ സുപ്രസിദ്ധമാണ്. അന്നസ്വാഇഹുദ്ദീനിയ്യ, അദ്ദഅ്വത്തുത്താമ്മ, രിസാലത്തുൽ മുആവന, മറ്റു വസ്വിയ്യത്തുകളും കത്തുകളും, അദ്ദേഹത്തിന്റെ സംഭാഷണങ്ങളുടെ സമാഹാരമായ തസ്ബീത്തുൽ ഫുആദ്, തത്ത്വജ്ഞാനങ്ങളും വിജ്ഞാനങ്ങളും ഉൾക്കൊള്ളുന്ന അദ്ദുർറുൽ മൻളൂം എന്ന മഹത്തായ കവിതാസമാഹാരം, വസ്വിയ്യത്തുകളും കത്തിടപാടുകളും എന്നിവ അവയിൽ ചിലതാണ്. അദ്ദേഹത്തിന്റെ മിക്ക ഗ്രന്ഥങ്ങളും അച്ചടിക്കപ്പെട്ടിട്ടുണ്ട്. ജനങ്ങൾ അവയെ വലിയ താൽപര്യത്തോടെ സ്വീകരിക്കുകയും പണ്ഡിതന്മാരും ആത്മജ്ഞാനികളും അവയെ വളരെയധികം പ്രശംസിക്കുകയും ചെയ്തു. ആത്മീയ ആഹാരമായി കരുതി പല സമയങ്ങളിലും അവർ അവ പാരായണം ചെയ്യാറുണ്ട്. ഹുജ്ജത്തുൽ ഇസ്ലാം ഇമാം ഗസ്സാലി (റ) യുടെ വചനങ്ങളുടെ സാരാംശവും കാതലുമാണ് അവയിൽ സമാഹരിക്കപ്പെട്ടിട്ടുള്ളതെന്നും, ഓരോ മുസ്ലിമിനും ഒഴിച്ചുകൂടാനാവാത്ത ലളിതവും സമഗ്രവുമായ ഗ്രന്ഥങ്ങളാണിവയെന്നും അവർ അഭിപ്രായപ്പെട്ടിട്ടുണ്ട്. ഗ്രന്ഥകാരനായ ഇമാം ഹദ്ദാദ് (റ) വിന്റെ ബറക്കത്ത് കൊണ്ട് അല്ലാഹു അവയിലൂടെ ജനങ്ങൾക്ക് വലിയ നന്മ നൽകി.
ഹിജ്റ 1079-ൽ അദ്ദേഹം ഹറമൈനികളിലേക്ക് (മക്കയിലേക്കും മദീനയിലേക്കും) യാത്ര ചെയ്യുകയും ഹജ്ജും ഉംറയും നിർവഹിക്കുകയും തന്റെ പിതാമഹനും ഇരുലോകങ്ങളുടെയും നേതാവുമായ നബി മുഹമ്മദ് (സ) യുടെ റൗളാ ശരീഫ് സന്ദർശിക്കുകയും ചെയ്തു. അവിടെ വെച്ച് ഹറമൈനികളിലെ പണ്ഡിതന്മാരുമായി അദ്ദേഹം സംഗമിച്ചു. അവർ അദ്ദേഹത്തിൽ സന്തോഷിക്കുകയും അദ്ദേഹത്തിന്റെ മഹത്ത്വം തിരിച്ചറിഞ്ഞ് പ്രശംസിക്കുകയും ചെയ്തു.
തത്ത്വജ്ഞാനത്തോടും സദുപദേശത്തോടും കൂടി ജനങ്ങളെ അല്ലാഹുവിലേക്ക് ക്ഷണിച്ചുകൊണ്ട് അദ്ദേഹം തന്റെ ജീവിതം തുടർന്നു. ഒടുവിൽ ഹിജ്റ 1132 ദുൽഖഅദ് 7-ന് ചൊവ്വാഴ്ച രാത്രി അദ്ദേഹം അല്ലാഹുവിന്റെ കാരുണ്യത്തിലേക്ക് യാത്രയായി. തരീമിലെ ‘സൻബൽ’ ഖബർസ്ഥാനിൽ അദ്ദേഹത്തെ ഖബറടക്കി. അല്ലാഹു അദ്ദേഹത്തിന് വിശാലമായ കാരുണ്യം ചൊരിയുകയും അദ്ദേഹത്തിൽ തൃപ്തിപ്പെടുകയും ചെയ്യട്ടെ. ഇരുലോകങ്ങളിലും അദ്ദേഹത്തെക്കൊണ്ടും അദ്ദേഹത്തിന്റെ വിജ്ഞാനങ്ങളെക്കൊണ്ടും അല്ലാഹു നമുക്ക് ഉപകാരം ചെയ്യട്ടെ, ആമീൻ.
ത്വാഹ ബിൻ ഹസൻ ബിൻ അബ്ദുറഹ്മാൻ അസ്സഖാഫ്
തുടരും…



